Հայաստանի Արարատի մարզի Ուրցաձոր բնակավայրից դեպի Գեղարքունիքի մարզի Մարտունի համայնք տանող նոր ավտոճանապարհ կկառուցվի. կառուցվելիք ճանապարհն ուղիղ կապ կհաստատի Արարատի և Գեղարքունիքի մարզերի միջև։ 

«Արմենպրես»-ի հաղորդմամբ՝ կառավարության նիստի ընթացքում այս մասին հայտարարեց ՀՀ վարչապետ Նիկոլ Փաշինյանը։

Վարչապետի խոսքով՝ ներկայում երկու մարզերը միմյանց հետ կապվում են միայն Վայոց ձորի, Կոտայքի մարզերի կամ Երևանի միջոցով, ինչը երկարացնում է երթուղին և սահմանափակում տնտեսական ու զբոսաշրջային կապերը։

«Այս ճանապարհը զգալիորեն կակտիվացնի ինչպես Գեղարքունիքի, այնպես էլ Արարատի մարզի տնտեսական կյանքը։ Ճանապարհի երկայնքով և վերջնակետերում կան զբոսաշրջային մեծ ներուժ ունեցող տարածքներ»,-ընդգծեց Փաշինյանը։