«Ամիրխանյանական երեկո» Արտաշատում՝ Մաեստրոյի ներկայությամբ. Արտաշատի համայնքապետարան
Արտաշատի «Ադանա» համալիրում կայացավ անվանի կոմպոզիտոր, ՀԽՍՀ ժողովրդական արտիստ, Հայաստանի կոմպոզիտորների միության երկարամյա նախագահ Ռոբերտ Ամիրխանյանին նվիրված «Ամիրխանյանական երեկո» համերգային ծրագիրը, որին, ի թիվս այլ հյուրերի, ներկա գտնվեց Արտաշատ համայնքի ղեկավար Կառլեն Մկրտչյանը։
Բեմում շուրջ երկու ժամ հնչեցին Մաեստրոյի սիրված և անկրկնելի ստեղծագործությունները։
Հայաստանի սիմֆոնիկ նվագախմբի և էստրադային ու օպերային հայտնի երգիչ–երգչուհիների կատարումները ընդունվեցին ջերմ ծափողջույններով։ Դրանք էլ ավելի ջերմացան, երբ բեմ բարձրացավ Մաեստրոն։
Արմատներով Արտաշատ համայնքի Շահումյան բնակավայրից է սիրված կոմպոզիտորը։
Երեկոյի ավարտին համայնքի ղեկավար Կառլեն Մկրտչյանը պատվոգիր ու հուշանվեր հանձնեց անվանի կոմպոզիտորին՝ ազգային մշակույթի զարգացման գործում նշանակալի ներդրման համար։
«Մեզ համար պատիվ ու հպարտություն է այսօր այստեղ վայելել Ձեր ներկայությունն ու հրաշալի ստեղծագործությունները, սիրելի Մաեստրո»՝ նշել է համայնքի ղեկավարը։
